Duonnas s'ingaschan per duonnas

:

22 duonnas da l'Engiadina e la Val Müstair han fundà il Zonta Club Engiadina cun üna gronda festa a Scuol sü Motta Naluns. Quai es il 23 avel da quists clubs in Svizra ed i'l Principadi da Lichtenstein.

Zonta es ün "Serviceclub" internaziunal da duonnas chi s'ingaschan pels interess da duonnas e mattas. "Il böt es da megliorar la situaziun giuridica, professiunala, economica e politica da mattas e duonnas". ha declarà in sonda Annegret Gallmann da Sent, la presidenta da l'uniun nouvfundada, a chaschun da la festa da fundaziun sün Motta Naluns. Sco vicepresidenta es gnüda eletta Martina Hänzi, il secretariat maina Cilgia Rest, tuottas duos da Scuol. "L'iniziativa da fundar ün simil club eir in nossa regiun ha gnü Suzanne von Blumenthal chi presidiescha il Zonta Club da Cuoira", ha contiunà Annegret Gallmann.

 

Surtdat il documaint ufficial

Sustegn per fundar ün club eir in Engiadina e Val Müstair han survgni las iniziantas da l'uschenomnada guvernatura da lur district Anita Schnetzer-Spranger da Schinzehim in Germania e da la directura da lur "area" Annemarie Loosli-Locher da Schaffusa. A la festa da fundaziun han tut part in sonda saira sün Motta Naluns in ustaria 108 persunas, zontianas e lur homens sco eir giasts da politica ed economia. Uschea d'eira preschaint il capo da Scuol Jon Domenic Parolini ed il vicepresident da la Pro Engiadina Bassa Jachen Gaudenz. In ün act festiv ha surdat Anita Schnetzer-Spranger ad Annegret Gallmann il documaint ufficial dal nouv Zonta Club e giavüschà tuot il bun a tuot las commembras. la festa es gnüda imbellida culla musica da Flurina Sarott, violina e da Gergana Lambreva, clavazin.

"Raits da contact fich preziusas"

Il Zonta Club da Cuoira es gnü fundà dal 1996. Daspö ot ons cummembra da quist club es cusgliera guvernativa Barbara Janom Steiner. In seis referat ha ella express seis plaschair chi exista ün da quists clubs uossa eir in Engiadina, "e cha la festa da fundaziun es güsta a Scuol sülla Motta Naluns, ingio ch'eu n'ha imprais ad ir culs skis". In seis referat s'ha ella dumandada preche cha clubs sco'l Zonta sajan necessaris: Ella es da l'avis ch'in da quists clubs as possa promouver il dialog e'l pensar cumplessiv, "i s'ha nempe contact cun duonnas da differentas spartas e da differentas proffessiuns". La commembranza a clubs sco il Zonta pussiblilteschan tenor ella raits da contact fich preziusas: "Per mai sun quistas raits sco la clav per avair success, i voul però pazianza ed eir perseveranza" ha di la cusgliera guvernativa, "i's sto chürar ils contacts ed eir dar, e na be vulair tour".

Autor: ANR

Auf dem Bild v.l.n.r. Annegret Gallmann, Suzanne von Blumenthal, Barbara Janom Steiner

Zonta